Lib.ru/Классика: Прокопович Феофан. Епиникион

Феофан Прокопович

Прокопович, Феофан. Сочинения

М. - Л., 1961

ЕПИНИКИОН

сиест пѣснь побѣдная о тоейжде преславной побѣдѣ

Аще когда найпаче нынѣ нам желати

Достоит многих устен, ибо ниже златый

Орган рифмотворческий воспѣти довлѣет

Нашей нынѣ радости, ниже что успѣет

Вѣтийских устен слово. О боже всесилный,

Еще наш приял еси вопль и плач умилный,

Еще нас не судиши в конец отринути!

Побѣдихом! Падеся супостат наш лютый,

И отступник приять казнь, отчества враг велий,

Ко нам же возвращенный грядет мир веселий

И безбѣдно здравие ведеть, со собою.

Нынѣ и день лучшею красен добротою,

И солнце множайшая луча испущает,

И лице краснѣйшее цвѣт полный являет.

Но коим прийде видом побѣда нам сия

И погрузи во крови главы проклятыя,

Ты рци, славо гласная! По всей же вселенной

Разсѣй велегласие вѣсти торжественной!

Уже брань десятое лѣто начинаше

(Время брани Троянской), егда уже бяше

Внутр отчества супостат сверѣпий и дивый,

Змѣнническим полчищем силу умноживый.

Тогда бог веемогущий, с высоты небесной

Призрѣв на люди своя и не терпя лестной

Ереси на избранных вию находити,

"Всуе, -- рече, -- вся сия вражия навѣты,

Да и всю лютость и вес изнурит яд звѣрный,

Хотя церковь попрати и род благовѣрный.

Аще рука змѣннича тебѣ прилучися,

О свѣю, моя, яже в силѣ прославися

И сотре ад, десница со Петром на брани

Будет, и узрим, коей побѣда ждет страни".

Сия изрек, абие ожесточи тогда

Сердца супостатския; яко же иногда

Лютаго фараона обять убо дивна

Гордость ум их и мечта, естеству противна..

Помыслиша бо себѣ от твердой сложенных

Руды и во стикгийской водѣ измовенных,

И не мощи своему язвитися тѣлу:

Таковую безумнѣ мняху в себѣ силу.

В полках же православных бог непостижимый,

Хотя им дати крѣпость и щит нерушимый,

Всѣх сердца осязает и мысли подробну,

И, аще страх и трепет или неудобну

Ярость ко согласию тайнѣ ощущает,

Изъемлет, и всѣх дивнѣ духи сопрягает

Крѣпким любве союзом, и вливает тверду

Дерзость, но не безбожну и не жестосерду,

Дабы ни на смертную силу полка многа,

Ни на лук свой уповал воин, чтущий бога.

Твое найпаче сердце смотрителнѣ строит,

О Петре, царей славо, и, яже достоит,

Потребныя времени подает совѣты

И благополучными веселит обѣты.

Тако егда обоим странам бог высокий

Судбы своя устрои, абие жестокий

Марс сию часть и ону начат поощрати; ,

Скорим бѣгом и вѣтру подобним до рати

Полки устремищася; сих ревность по вѣри

И отчествѣ раждеже, овѣх же без мѣри

Распали бѣс яростный и жаждущий крови.

Летит евѣй, летит купно змѣнник неистовыйк

Камо духом бѣсовским бѣжиши носимий,

Студе вѣку нашего, вреде нестерпимий?

На отца отчествия мещеши меч дерзкий!

О племя ехиднино! О изверже мерзкий!

Забыв любов отчую и презрѣв самаго

Твердый закон естества! Обаче се благо,

Яко скорий ест на казнь, косний сий на дѣлоѵ

Бѣжѣте, скорой мести требѣ, скорой зѣло!

Но и здѣ непостоян злый змѣнник явися,

Змѣнив царю и Марсу: егда бо открися,

Поле бою страшнаго, не токмо входити;

Во ратный огнь, но ниже издалече зрѣти

Не дерзну; но сугуб студ приять вмѣсто рани,

Непостоян во вѣрѣ, трепетен во брани.

Зрѣм же, что и свѣй дерзкий силою своею

Успѣ храброй России, боряся со нею.

Блисну огнем все поле; многия воскорѣ

Излетѣша молния; не таков во морѣ

Шум слышится, егда вѣтр на вѣтр ударяет,

Ниже тако гром з темных облаков рыкает,

Яко гримят армати, и гласом и страхом,

И уже день помрачи дым, смѣшен со прахом.

Страшное блистание, страшний и великий

Град падает желѣзный; обаче толикий

Страх не может России сил храбрих сотерти:

Не боится, не радит о видимой смерти.

Но егда тя, о царю и воине силный,

Узрѣ посредѣ огня, объять ю страх зѣлный;

Вострепета и крайней убояся страсти,

Да бы в едином лицу всѣм не пришло пасти.

Но не попусти прийти бѣдству таковому

Бог силный. Абие бо от горняго дому

Низпосла щит (щит, им же во лютое время

Хранит грады, и царства, и людское племя)

И вся на главу твою и на твоя силы

Летущия сотвори бездѣлныя стрѣлы.

Свѣй же, во оружии своем уповая,

Гиінет яественнѣ, егда¹ коей избивая

Смерти, огнем летущой; лиется кровь всюду;

Стелет землю трупие; мало уже люду

Зрится во полках его. И недолго бяше

Сумнительна побѣда. О блаженство наше!

Царю богом вѣнчанный, ты, силен о бозѣ,

Сокрушив, повергл еси гордаго под нозѣ.

О день благополучний! Кий язык и кое

Слово изрещи может блаженство такое!

Укри труп свѣйский поле, падеся род лютый,

Наша покусивыйся главы низринути.

Что о воех и вождах речѳм во плѣнь взятых?

О користех, .знаменах и бронях богатых?

Аки бы з тым супостат пришел к нам совѣтом,

Да бы нас наслѣдники благ своих² завѣтом

Крайним явѣ сотворил; инных скороногий

Страх изнесе, и уже во силѣ немногий і

Сам лев, иже многия устрашаше грады,

В лѣсы, в чащы побѣже искати отрады. .

С малою ли бѣжиши, звѣре, срамотою,

Хоботом заглаждая слѣд твой за собою?

Кое убо торжество, кий лик будет равный

Сей побѣдѣ? Тебѣ же, монархо державный,

Что в дар твоя Россия принесет и кия

Воспоет пѣсни? Ибо побѣдити свѣя

Коим либо образом дивно бывсѣм дѣло

Было, яко в повѣстех славимаго зѣло.

Что же, егда лютая в отчества предѣлы

Внийде брань и ко врагом змѣнничия силы

Приставше зваху роди, царствию твоему

От древле враждебныя, ко числу своему;

И молвы великия повсюду восташа,

И аки море земля потрясеся наша.--

Коликия зде врагом возрастоша роги,

Тебѣ же неудобства и труды премноги!

Требѣ бяше на много частей раздѣляти

Воинство и многия грады укрѣпляти,

Укрощевати молвы, предѣлы хранити,

Блюсти и познавати двоих врагов сѣти.

Обаче в толь тяжкий год (О безсмертной славы

Дѣло!) побѣдил еси. Позна величавый

Свѣй суетну бров быти гордины своея

И, поражен силою десници твоея

Аки с небес молнием, достиже злонравный

В конец Фаетоновой погибели равный.

Тѣмже прийми, о храбрий царю, цвѣт побѣдный

И силы, яже в тебѣ Марс сей многобѣдный

Изнури и сотрясе трудом непрестанным,

Обновляй всерадостнѣ торжеством избранным.

Совосплещут градове на слух сей веселий,

Пройдет стѣны и врата глас торжества велий.

Нынѣ тебѣ родися слава, царству равна,

И титла, паче царских титл честна и славна,

О сем преславном дѣлѣ, в пѣснех неслыханном:

Пѣти будет веселник по морю пространном;

Пѣти будет на холмѣ путник утружденный,

И оповѣсть іиногда лѣты изнуренный

Старец внуком, и, яко своима очима

Видѣ то, внуци старца нарекут блажима.

Мало се: пройдет скоро глас сей торжественный,

На мир весь хугубому верху подложенный.

Всяк слышай сумнѣнныя мысли в сердцё приймег,

И всѣх силы твоея страх велий обиймет;

Вси твоей начнут дружбы, вси мира желати

И не дерзнут рускаго Марса раздражати.

Бог же, сие блаженство давый нам тобою,

Тожде твоим здравием и дний долготою

Да укрѣпит, желаем, всегда ти побѣдну

Дая помощ, да бы и лютую ехидну,

Пиющую кровь святых, твоим же убити

Дал тебѣ оружием, и вся сокрушити

Темиици варварския и ярем безмѣрный,

И от долгих узилищ извести род вѣрный,

Да же, вся побѣдныя совершивше рати,

Крест на стѣнах Сионских водрузиши златый.

¹ В издании едда

² В издании своим.

Комментарии: 1, последний от 11/02/2012. Прокопович Феофан (bmn@lib.ru) Год: 1709 Обновлено: 08/08/2011. 21k. Статистика. Поэма: Поэзия Стихотворения	Скачать FB2 Оценка: *3.8828** Ваша оценка:
Аннотация: сиест песнь победная о тоейжде преславной победе

Прокопович Феофан Епиникион

Прокопович Феофан
Епиникион